کراچی (نمائندہ خصوصی) قومی کرکٹ ٹیم کے سابق کپتان جاوید میانداد نے بھارتی مسلمانوں سے کہا ہے کہ وہ اپنی حفاظت کیلئے چھری یا چھرا ساتھ لے کر نکلیں اور اگر کوئی تمہیں مارنے کی کوشش کرتا ہے تو 2 کو ساتھ لے کر مرو۔
قومی کرکٹ ٹیم کے سابق کپتان جاوید میانداد نے شہر قائد میں ’کشمیر کجہتی پریڈ‘ میں شرکت کی۔ انہوں نے شرکا سے خطاب کرتے ہوئے کہا کہ وہ آج پوری دنیا بالخصوص مودی کو بتانا چاہتے ہیں کہ پورا پاکستان ’ کشمیر بنے گا پاکستان‘ کے ایجنڈے پر اکٹھا ہے۔
جاوید میانداد نے بھارت میں بسنے والے مسلمانوں پر ہونے والے ہجومی تشدد کے بارے میں بھی بات کی اور کہا ’ بھارتی مسلمان بھائیوں کو پیغام دینا چاہتا ہوں، انڈیا میں ایک آدمی کو 20، 20 لوگ مارتے ہیں جس کو دیکھ کر بڑا افسوس ہوتا ہے، مسلمان بھائی آپ اپنی حفاظت کیلئے گھر سے باہر نکلیں تو چھری یا چھرا لے کر باہر نکلیں، یہ ہندو قوم ہے جو چھری دیکھنے کے بعد کبھی تمہیں ہاتھ نہیں لگائے گی، جب مرو تو 2 کو مار کر مرو کیونکہ مسلمان شہادت پر یقین رکھتا ہے۔‘
جاوید میانداد کا کہنا تھا کہ بھارتیوں کے پاس ہتھیار ہیں اور جس طرح وہ مسلمانوں کو مار رہے ہیں یہ قتل عام ہے اس لیے مسلمان اپنی حفاظت کا بندو بست کرکے نکلیں۔
پریڈ کے دوران صحافیوں سے گفتگو کرتے ہوئے جاوید میانداد نے کہا کہ ’ہم نے نیوکلیئر بم چلانے کیلئے رکھے ہوئے ہیں بس ہمیں موقع چاہیے، ہم صاف کردیں گے۔‘