کورونا وائرس ،پی ایس ایل کے بعد آئی پی ایل بھی متحدہ عرب امارات پہنچ گیا ،پہلا میچ کب ہو گا ؟ کرکٹ مداحوں کے دلچسپی کی خبر آگئی

ممبئی(نمائندہ خصوصی) بھارت میں کورونا وائرس کی حالیہ لہر کے بعد ملتوی ہونے والی انڈین پریمیر لیگ (آئی پی ایل )کو متحدہ عرب امارت میں آزمائشی طور پردوبارہ شروع کرنے کا فیصلہ کرلیا گیا ہے ۔
بھارتی میڈ یا کے مطابق بی سی سی آئی کے ایک سینئر عہدیدار نے بتایا کہ ملتوی کردہ انڈین پریمیر لیگ متحدہ عرب امارات میں 18 یا 19 ستمبر کو آزمائشی طور پر دوبارہ شروع ہوگی اورفائنل 9 یا 10 اکتوبر کو ہوسکتا ہے۔انہوں نے کہا کہ 18ستمبر ہفتہ اور 19ستمبر اتوار ہے ،اس لیے زیادہ امکان ہے کہ ان تاریخوں میں آئی پی ایل کا آغاز کیا جائے ۔اسی طرح ٹورنا منٹ کا اختتام بھی ہفتے کے آخر میں ہو گا ۔واضح رہے کہ بھارت میں کورونا وائرس کی لہر بڑھنے کے باعث آئی پی ایل کو چار مئی کو ملتوی کردیا گیا تھا ۔
دوسری جانب کورونا کے باعث پی ایس ایل پہلے ہی متحدہ عرب امارات منتقل ہو چکا ہے اور پہلا میچ پانچ جون کو متوقع ہے۔