” اہم بل چوبیس یا 48 گھنٹوں میں منظور نہیں کیے جاتے بلکہ اس سے پہلے یہ کام کرنا ہو گا “نوازشریف نے آرمی ایکٹ میں ترمیم کے بل پارٹی کو ہدایات جاری کر دیں

لندن(نمائندہ خصوصی ) سابق وزیر اعظم میاں نواز شریف نے آرمی چیف کی مدت ملازمت میں توسیع کیلئے منظور کیے گئے آرمی ایکٹ ترمیمی بل پر پارٹی کو اہم ہدایات جاری کردیں۔
نجی ٹی وی جیونیوز کے مطابق لندن روانگی کے بعد نوازشریف نے اپنے پہلے بیان میں خواجہ آصف کو تحریری ہدایات جاری کیں اور کہا کہ اہم بل 24 یا 48 گھنٹوں میں منظور نہیں کیے جاتے لہٰذا آرمی ایکٹ ترمیمی بل کی منظوری کے لیے کم سے کم یہ ٹائم فریم اپنایا جائے کہ بل آج قومی اسمبلی میں پیش کیا جائے اور سٹینڈنگ کمیٹی کو ریفر کردیا جائے۔انہوں نے کہاکہ جلدبازی نہ کریں اور پروسیجرز بلڈوز نہ کریں، اتنا اہم بل منظور کرنے کے لیے پارلیمنٹ کو ربر اسٹیمپ جیسا نظر نہیں آنا چاہیے، حکومت پر زور دیا جائے کہ پارلیمانی اقدار اپنائی جائیں اور بل پر مثبت انداز سے دیکھا جائے گا مگر پارلیمنٹ کی توقیر پر سمجھوتا نہیں کیا جاسکتا۔
انہوں نے مزید کہا کہ تمام سیاسی جماعتیں اپنی پارلیمانی پارٹیوں کا سیشن بلائیں اور بل پر غور کریں، پارلیمانی اقدار کا مناسب خیال نہ رکھا گیا تو اثرات تمام سیاسی جماعتوں پر پڑیں گے۔میاں نواشریف کا کہنا تھا کہ اس سے پہلے کہ حکومت بل قومی اسمبلی میں پیش کرے، ن لیگ اپنی پارلیمانی پارٹی کی میٹنگ بلائے، تمام اراکین قومی اسمبلی اور سینیٹ کو ان ہدایات سے آگاہ کیا جائے۔
واضح رہے کہ آرمی چیف کی مدت ملازمت میں توسیع کے سلسلے میں قانون سازی کا عمل جاری ہے اور مسلم لیگ (ن) نے آرمی ایکٹ میں ترمیم کی غیر مشروط حمایت کا اعلان کیا ہے۔