کراچی (نمائندہ خصوصی) پاکستان سپر لیگ (پی ایس ایل) کے 27 ویں میچ میں ملتان سلطانز نے سنسنی خیز مقابلے کے بعد پشاور زلمی کو 3 رنز سے شکست دیدی ہے۔
تفصیلات کے مطابق میچ نیشنل سٹیڈیم کراچی میں بند دروازوں کے پیچھے کھیلے گئے میچ میں پشاور زلمی کے کپتان وہاب ریاض نے ٹاس جیت کر ملتان سلطانز کو بیٹنگ کی دعوت دی جس نے ذیشان اشرف کی عمدہ بلے بازی کی بدولت مقررہ 20 اوورز میں 6 وکٹوں کے نقصان پر 154رنز بنائے۔ ذیشان اشرف نے 39 گیندوں پر 1 چھکے اور 7 چوکوں کی مدد سے52 رنز بنائے جبکہ دیگر بلے بازوں میں روحیل نذیر 14، شان مسعود 28، معین علی 0، روی بوپارا 5، خوشدل شاہ 30 اور شاہد آفریدی 19 رنز بنا سکے۔
پشاور زلمی کی جانب سے راحت علی سب سے کامیاب باﺅلر رہے جنہوں نے 4 اوورز میں 24 رنز کے عوض 3 کھلاڑیوں کو پویلین کی راہ دکھائی جبک حسن علی، محمد عامر خان اور وہاب ریاض نے ایک، ایک وکٹ حاصل کی۔
پشاور زلمی کی ٹیم ہدف کے تعاقب میں اچھا آغاز فراہم کرنے میں ناکام رہی اور صرف 8 کے مجموعی سکور پر ہی 2 کھلاڑی آﺅٹ ہو گئے تاہم امام الحق اور شعیب ملک نے عمدہ بیٹنگ کرتے ہوئے جیت کی امید بحال کی لیکن اس کے باوجود پوری ٹیم 20 اوورز میں 7 وکٹوں کے نقصان پر 151 رنز ہی بنا سکی۔ امام الحق 41 گیندوں پر 2 چھکوں اور 4 چوکوں کی مدد سے 56 رنز بنا کر نمایاں رہے جبکہ عمر امین نے 29 اور شعیب ملک نے 30 رنز بنائے۔
ملتان سلطانز کی جانب سے سہیل تنویر سب سے کامیاب باﺅلر رہے جنہوں نے 4 اوورز میں 26 رنز کے عوض 3 کھلاڑیوں کو پویلین کی راہ دکھائی اور علی شفیق نے 2 وکٹیں حاصل کیں جبکہ محمد عرفان اور معین علی ایک، ایک کھلاڑی کو آﺅٹ کرنے میں کامیاب ہو سکے۔
واضح رہے کہ ملتان سلطانز کی قیادت شان مسعود کر رہے ہیں جبکہ دیگر کھلاڑیوں میں معین علی، علی شفیق، روی بوپارا، عمران طاہر، خوشدل شاہ، محمد عرفان، روحیل نذیر، شاہد آفریدی، سہیل تنویر اور ذیشان اشرف شامل ہیں۔
پشاور زلمی کی قیادت وہاب ریاض کر رہے ہیں جبکہ دیگر کھلاڑیوں میں کامران اکمل، امام الحق، حیدر علی، عمر امین، شعیب ملک، عادل امین، حماد اعظم، وہاب ریاض، حسن علی، محمد عامر خان اور راحت علی شامل ہیں۔
