پی ایس ایل 2020 کے شیڈول میں تبدیلی

کراچی۔(غلام مصطفے عزیز)۔پاکستان کرکٹ بورڈ (پی سی بی) نے پی ایس ایل 2020 کے شیڈول میں تبدیلی کردی ہے۔ جمعہ کو جاری کردہ اعلامیہ کے مطابق پی سی بی نے ایونٹ کے پلے آف میچز کو سیمی فائنل اور فائنل میں تبدیل کردیا ہے۔ فیصلے کے مطابق پی ایس ایل کو چار روز تک محدود کردیا گیا ہے۔ نئے شیڈول کے مطابق پی ایس ایل میں اب 34 کی بجائے 33 میچز کھیلے جائیں گے۔ نئے شیڈول کے مطابق دونوں سیمی فائنلز 17 مارچ کو قذافی اسٹیڈیم لاہور میں کھیلے جائیں گے۔ پوائنٹس ٹیبل پر پہلی پوزیشن پر موجود ٹیم اب ایونٹ کی چوتھی بہترین ٹیم سے دوپہر 2 بجے پہلے سیمی فائنل میں مدمقابل آئے گی۔ پوائنٹس ٹیبل پر دوسری اور تیسری پوزیشنز پر موجود ٹیموں کے درمیان مقابلہ شام 7 بجے شروع ہوگا۔ ایونٹ کا فائنل بدھ 18 مارچ کو شام 7 بجے قذافی اسٹیڈیم لاہور میں شروع ہوگا۔ شیڈول میں تبدیلی تمام ٹیموں کے مالکان کی رضامندی سے کی گئی ہے۔ پی سی بی اس حوالے سے حکومتِ پنجاب سے مسلسل رابطے میں ہے۔ قذافی اسٹیڈیم میں شیڈول آئندہ چاروں میچوں میں تماشائیوں کی شرکت کے بارے میں بھی مقامی حکومت کی سفارش پر عمل کیا جائے گا۔ اس حوالے سے حتمی اعلان جلد کردیا جائے گا۔ نئے شیڈول کے مطابق 13 مارچ کو نیشنل اسٹیڈیم کراچی میں پشاور زلمی بمقابلہ ملتان سلطانز رات 8 بجے شروع ہوگا۔ راشد ریاض اور مائیکل گف (آن فیلڈ امپائرز)، احسن رضا (تھرڈ امپائر)، فیصل خان آفریدی (فورتھ امپائر) اور روشن ماہنامہ (میچ ریفری) ہوں گے۔ 14 مارچ کو نیشنل اسٹیٹیم کراچی میں کراچی کنگز بمقابلہ اسلام آباد یونائیٹڈ شام 7 بجے ہوگا۔ اس میچ میں احسن رضا اور مائیکل گف (آن فیلڈ امپائرز)، راشد ریاض (تھرڈ امپائر)، فیصل خان آفریدی (فورتھ امپائر) اور روشن ماہنامہ (میچ ریفری) کے فرائض انجام دیں گے۔ 15 مارچ کو قذافی اسٹیڈیم لاہور میں ملتان سلطانز بمقابلہ لاہور قلندرز دوپہر 2 بجے ہوگا اور شوزب رضا اور علیم ڈار (آن فیلڈ امپائرز)، آصف یعقوب (تھرڈ امپائر)، ناصر حسین (فورتھ امپائر) اور محمد انیس(میچ ریفری) ہوں گے۔ اسی دن نیشنل اسٹیڈیم کراچی میں کوئٹہ گلیڈی ایٹرز بمقابلہ کراچی کنگز شام 7 بجے ہوا جبکہ راشد ریاض اور مائیکل گف (آن فیلڈ امپائرز)، احسن رضا (تھرڈ امپائر)، فیصل خان آفریدی (فورتھ امپائر) اور روشن ماہنامہ (میچ ریفری) کے فرائض انجام دیں گے۔ 17 مارچ کو قذافی اسٹیڈیم لاہور میں پہلا سیمی فائنل پوائنٹس ٹیبل پر ٹیم نمبر 1 بمقابلہ 4 دوپہر 2 بجے کھیلا جائے گا جبکہ دوسرا سیمی فائنل پوائنٹس ٹیبل پر ٹیم نمبر 2 بمقابلہ 3 شام 7 بجے کھیلا جائے گا۔18 مارچ کو قذافی اسٹیڈیم لاہور میں فائنل شام 7 بجے کھیلا جائے گا۔ مزیدبرآں آئی سی سی کی میڈیکل ایڈوائزری کے مطابق صابن یا پانی سے20 سیکنڈز تک ہاتھ دھوئیں، اگر صابن یا پانی دستیاب نہیں تو سینیٹائزر کا استعمال کریں جس میں کم از کم 60 فیصد الکوحل ہو۔ دھوئے بغیر اپنی آنکھوں، ناک اور منہ پر ہاتھ مت لگائیں، بیمار لوگوں سے دور رہیں، اگر آپ بیمار ہیں تو سفر سے اجتناب کریں، کھانسی اور بخار کی صورت میں طبی امداد حاصل کریں، اگر آپ بیمار ہیں تو گھر میں رہیں، چھینکتے وقت ٹشو پیپر یا رومال کا استعمال کریں، استعمال کے بعد ٹشو پیپر یا رومال کو کوڑا دان میں ضرور ڈالیں، متواتر استعمال والی اشیاء کی صفائی کا خاص رکھیں۔