ایچ بی ایل پی ایس ایل، پی سی بی اور فرنچائزز دو اضافی انتخابوں پر متفق

کراچی(غلام مصطفے عزیز)پاکستان کرکٹ بورڈ اور تمام چھ ایچ بی ایل پی ایس ایل فرنچائزز نے اتفاق کیا ہے کہ تمام ٹیمیں 27 جنوری سے 27 فروری تک منعقد ہونے والی ایچ بی ایل پاکستان سپر لیگ 2022 کے لیے سپلیمنٹری کیٹیگری میں دو اضافی کھلاڑیوں کا انتخاب کر سکتی ہیں۔ پاکستان کرکٹ بورڈ (پی سی بی) سے جمعہ کو یہاں جاری کردہ اعلامیہ کے مطابق اگرچہ ہر فریق ایک ایک غیر ملکی کھلاڑی کا انتخاب کر سکتا ہے لیکن اس فیصلے سے مقامی ابھرتے ہوئے کرکٹرز کے لیے فرنچائز کرکٹ کا تجربہ کرنے کے مواقع کھلتے ہیں جو ان کی گرومنگ اور ترقی میں معاون ثابت ہوگی۔ یہ ٹیموں کو اضافی کھلاڑی بھی فراہم کرے گا۔ ٹیمیں متبادل پلیئر ڈرافٹ میں اضافی کھلاڑیوں کا انتخاب کریں گی جو 7 جنوری 2022 کو ایک ورچوئل سیشن کے ذریعے متوقع ہے۔ کراچی کنگز کے پاس پہلے اضافی کھلاڑی کا انتخاب کرنے کا پہلا آپشن ہوگا، اس کے بعد لاہور قلندرز، اسلام آباد یونائیٹڈ، کوئٹہ گلیڈی ایٹرز، ملتان سلطانز اور پشاور زلمی ہوں گے۔ اس آرڈر کا فیصلہ رینڈم قرعہ اندازی کے ذریعے کیا گیا ہے۔ریورس آرڈر فارمیٹ کا استعمال کرتے ہوئے دوسری پکس پشاور زلمی، ملتان سلطانز، کوئٹہ گلیڈی ایٹرز، اسلام آباد یونائیٹڈ، لاہور قلندرز اور کراچی کنگزکی ہوں گی۔