• Fri. Apr 19th, 2024

ٹیلی ویژن کی پہچان لیجنڈ اداکار عابد علی 67 برس کی عمر میں انتقال کرگئے

Sep 5, 2019

کراچی(غلام مصطفے عزیز) لیجنڈ اداکار عابد علی 67 برس کی عمر میں انتقال کرگئے۔ عابد علی گذشتہ دو ماہ سے کراچی کے نجی اسپتال میں زیر علاج تھے۔ عابد علی کا یرقان بگڑ گیا تھا اور وہ کئی روز سے وینٹی لیٹر پر تھے۔ صدر پاکستان نے1985 میں عابد علی کو پرائڈ آف پارفامنس سے بھی نوازا۔ خواہش ، دشت ،دوسرا آسمان ، وارث اور مہندی عابد علی کے یادگار ڈرامے ہیں۔ عابد علی نے آخری بار فلم ہیر مان میں اداکاری کے جوہر دکھائے۔ ٹیلی ویژن نگری میں شہرت کی بلندیوں کو چھونے والے صدارتی ایوارڈ یافتہ اداکار عابد علی 1952میں کوئٹہ میں پیدا ہوئے۔ان کی تین بیٹیاں ہیں۔بیٹی ایمان علی نے جیو کی فلم بول سے شہرت حاصل کی۔ان کی دو شادیاں ہیں۔پہلی بیگم حمیرا علی اور دوسری رابعہ نورین ہیں۔ان دونوں کا تعلق بھی شوبز سے ہے۔عابد علی کو امجد اسلام امجد کے لکھے ہوئے ڈرامے وارث سے شہرت حاصل ہوئی۔ان نے سینکڑوں ٹیلی ویژن ڈراموں اور درجنوں فلموں میں کام کیا۔ان دنوں کی نئی فلم “ہیر مان جا” سنیما گھروں کی زینت بنی ہوئی ہے۔جیو ٹیلی ویژن سے دو ڈرا مہ سیریلز “میرا رب وارث” اور “رمز عشق” ان ائیر ہے۔ دریں اثناء گورنر سندھ عمران اسماعیل نے اداکار عابد علی کے انتقال پر گہرے دکھ کا اظہار کیا ہے۔ انہوں نے کہا کہ عابد علی کے انتقال سے ملک ایک عظیم فنکار سے محروم ہوگیا، عابد علی کے انتقال سے پیدا ہونے والا خلا کبھی پُر نہیں ہوگا۔ اللہ تعالیٰ عابد علی کے درجات بلند کرئے اور اہلخانہ کو اس مشکل گھڑی میں صبر جمیل عطا کرے۔ وزیر اعلیٰ سندھ سید مراد علی شاہ نے بھی معروف اداکار عابد علی کے انتقال پر گہرے دکھ کا اظہار کرتے ہوئے کہا کہ مرحوم کا بہترین کام ہمیشہ یاد رکھا جائے گا، وزیر اعلیٰ سندھ نے مرحوم کی مغفرت کے لیے بھی دعا کی ہے۔