پی ایس ایل 2020شیڈول کے مطابق جاری رہے گی

کراچی(غلام مصطفے عزیز)پاکستان سپر لیگ (پی ایس ایل) فائیو 2020 کی فرنچائزڈ ٹیموں میں سے 14 غیرملکی کھلاڑی، ایک ٹرینر اور ایک غیر ملکی کوچ نے پی ایس ایل 2020 چھوڑ کر جانے کی تصدیق کردی ہے۔ پاکستان کرکٹ بورڈ (پی سی بی) سے جاری کردہ اعلامیہ کے مطابق پی سی بی نے جمعہ کے رو ز معمول کے مطابق تمام ٹیموں کے مالکان سے کانفرنس کال پر رابطہ کیا۔ جس میں اتفاق کیا گیا ہے کہ پی ایس ایل 2020 شیڈول کے مطابق جاری رہے گی، تمام کھلاڑیوں اور اسپورٹ اسٹاف کو خواہش کے مطابق پی ایس ایل 2020 سے دستبردار ہونے کی اجازت دے دی گئی ہے۔ کراچی کنگز کے ایلکس ہیلز، ملتان سلطانز کے رائیلی روسو اور جیمز ونس، پشاور زلمی کے ٹام بنٹن، کارلوس بریتھ ویٹ، لیام ڈاسن، جیمز فوسٹر، (کوچ) لوئس گریگری اور لیام لیونگ اسٹون، کوئٹہ گلیڈٰ ایٹرز کے جیسن رائے اور ٹائمل ملز ، اسلام آباد یونائیٹڈ کے
کولن منرو، ڈیل اسٹین، ڈیوڈ ملان اور لیوک رونکی اور ٹرینر کورے روٹگئیرز
نے پی ایس ایل 2020 چھوڑ کر جانے کی تصدیق کردی ہے۔ قانون کے مطابق تمام ٹیموں کو متبادل کھلاڑیوں کے انتخاب کی اجازت ہوگی جس کی منظوری ایونٹ ٹیکنکل کمیٹی دے گی۔ پی سی بی اس ضمن میں صورتحال کا باقاعدگی سے جائزہ لیتا رہے گا اور اس دوران وہ تمام ٹیموں کے مالکان سے رابطے میں رہے گا۔ تاحال کسی کھلاڑی کا کورونا وائرس کا ٹیسٹ مثبت نہیں آیا۔ تاحال پاکستان کپ اور بنگلہ دیش کے خلاف سیریز سے متعلق کوئی تبادلہ خیال نہیں کیا گیا۔ چیف ایگزیکٹو پی سی بی وسیم خان نے کہا ہے کہ موجودہ حالات میں صورتحال مسلسل تبدیل ہورہی ہے جس پر مسلسل نظر رکھنے کی ضرورت ہے۔ انہوں نے کہا کہ آج پی سی بی اور تمام ٹیموں کے مالکان نے اپنی ذمہ داری کا احساس کرتے ہوئے تمام کھلاڑیوں کو اپنی مرضی سے لیگ چھوڑنے کی اجازت دے دی ہے کیونکہ کھلاڑیوں کا اعتماد اور یقین پی سی بی کے لیے سب سے اہم ہے۔ چیف ایگزیکٹو پی سی بی نے مزید کہاکہ وہ یہ واضح کرنا چاہتے ہیں کہ فی الحال 10 کھلاڑیوں اور ایک کو چ کی جانب سے لیگ چھوڑنے کا فیصلہ اس لیے لیا گیا ہے کہ انہیں مستقبل میں فلائیٹ آپریشن معطل ہونے یا اپنے ممالک کے بارڈر بند ہونے کا خطرہ ہے۔ وسیم خان نے کہاکہ پی سی بی ان تمام کھلاڑیوں کی بحفاظت واپسی کو یقینی بنائے گا، دیگر کھلاڑیوں اور اسپورٹ اسٹاف کے لیے بھی یہی پروٹوکول اپنایا جائے گا۔ انہوں نے کہا کہ ماضی کی طرح پی سی بی صورتحال کا مسلسل جائزہ لیتا رہے گا اور ایونٹ کے شرکاء کی حفاظت اور صحت سے متعلق کوئی بھی فیصلہ کرنے سے ہچکچاہٹ کا مظاہرہ نہیں کرے گا۔