پاکستان میں کورونا وائرس کے سبب کتنے فیصد ملازم بے روزگار ہوئے ؟وزارت منصوبہ بندی کی اہم رپورٹ سامنے آگئی

اسلام آباد (نمائندہ خصوصی) سینیٹ اجلاس میں وزارت منصوبہ بندی کی جانب سے کورونا وائرس سے شہریوں کی آمدن و روزگار متاثر ہونے کی رپورٹ پیش کردی گئی۔ رپورٹ کے مطابق ملازمت پیشہ آبادی کا 49فیصد کورونا سے متاثر ہوا ہے۔
تفصیلات کے مطابق چیئرمین سینیٹ صادق سنجرانی کی زیر صدارت ہونے والے اجلاس میں وزارت منصوبہ بندی و ترقیات نے اعدادوشمار ایوان میں پیش کیے۔ رپورٹ میں کہا گیا ہے کہ کورونا کا سماجی و اقتصادی اثرات کا جائزہ لینے کیلئے خصوصی سروے کیا،سروے کے مطابق ملازمت پیشہ آبادی کا 49فیصد حصہ کورونا سے متاثر ہوا،کورونا سے 37فیصد ورکرز کی ملازمت چلی گئی یا کام نہیں ڈھونڈ سکے جبکہ 12 فیصد ورکرز کی آمدن میں کمی ہوئی۔
وزارت منصو بہ بندی کے مطابق کورونا سے متاثرہ ملازمت پیشہ افراد کی تعداد 27.31ملین ہے،عالمی وبا سے سب سے زیادہ خیبر پختونخوا متاثر ہوا،خیبر پختونخوا میں 55فیصد افراد کی ملازمت گئی اورآمدنی میں کمی ہوئی۔