“ایسے پلیئرز کے ساتھ کھیلنا پڑا جو غلط سرگرمیوں میں حصہ ڈال رہے تھے” شعیب اختر کے بعد محمد حفیظ بھی بول پڑے

کراچی(ویب ڈیسک) قومی کرکٹ ٹیم کے آل رائونڈر محمد حفیظ نے بھی غلط کاموں میں ملوث افراد کی نشاندہی کرتے ہوئے کہا ہے کہ انہیں ایسے پلیئرز کے ساتھ کھیلنا پڑا جو غلط سرگرمیوں میں حصہ ڈال رہے تھے۔
محمد حفیظ نے دعویٰ کیا کہ انہوں نے ایسے کرداروں کیخلاف آواز اٹھانے کی کوشش کی تو انہیں خاموش رہنے کی تلقین کی گئی۔ محمد حفیظ نے شعیب اختر کے یوٹیوب چینل پر گفتگو کے دوران انکشاف کیا کہ مذکورہ کھلاڑی ان کے بھائیوں کی طرح ہیں جن کیلئے محض دعا ہی کی جا سکتی ہے، مگر جو کچھ انہوں نے کیا، وہ اس کے شدید مخالف تھے۔ جب انہوں نے اس سلسلے میں آواز اٹھانے کی کوشش کی تو انہیں بتا دیا گیا کہ اگر پاکستان کیلئے مزید کھیلنے کی امید ہے تو خاموشی اختیار کرو۔
محمد حفیظ نے کہا کہ چونکہ انہیں اپنا کیریئر عزیز تھا لہٰذا انہوں نے ایسا ہی کیا کیونکہ وہ اپنی مثبت توانائی پاکستان کیلئے استعمال کرنا چاہتے تھے۔ انہوں نے تسلیم کیا کہ وہ ان کھلاڑیوں کے ساتھ کھیلتے رہے جو سراسر غلط اقدام تھا کیونکہ اس سے پاکستان کرکٹ کو کوئی فائدہ نہیں پہنچا اور نہ ہی ان کھلاڑیوں کو واپس لانے سے جو غلط کاموں میں ملوث تھے۔
یاد رہے کہ اس سے قبل سابق فاسٹ بالر شعیب اختر بھی یہ دعویٰ کر چکے ہیں کہ انہیں اپنے کیریئر کے دوران اکثر بائیس مخالف افراد کا سامنا کرنا پڑا جو صرف مخالف سائیڈ میں ہی نہیں بلکہ ان کی اپنی ٹیم میں بھی موجود تھے۔ راولپنڈی ایکسپریس نے اپنے بیان میں صاف الفاظ میں کہا تھا کہ وہ پاکستانی ٹیم میں کھیلتے ہوئے میچ فکسرز کے درمیان گھرے ہوئے تھے۔