لاہور (نمائندہ خصوصی )شہبازشریف نے آشیانہ ہاﺅسنگ سکیم ریفرنس کی احتساب عدالت میں سماعت کے دوران چینی سفیر کی جانب سے لکھا گیا خط پیش کر دیا ۔
احتساب عدالت میں آشیانہ ہاﺅسنگ ریفرنس پر سماعت ہوئی جس دوران عدالت نے شہبازشریف سے استفسار کیا کہ آپ کچھ کہنا چاہتے ہیں ؟ شہبازشریف نے کہا میں عدالت میں خط پیش کرنا چاہتا ہوں ۔ شہبازشریف نے عدالت میں چینی سفیر کی جانب سے لکھا گیا خط پیش کیا اور کہا کہ چینی سفیر نے میرے سی پیک منصوبوں کی تعریف کی ہے ، ایک قیدی کو چینی سفیر خط لکھ رہاہے جو اعزاز سے کم نہیں ہے ، چین پاکستان کا بہترین دوست ہے ۔
ان کا کہناتھا کہ دو سال سے مجھ پر الزامات کی بوچھاڑ کی جارہی ہے لیکن الزامات کے باجود چین کے سفیر میری تعریف کر رہے ہیں ۔ شہبازشریف کی جانب سے عدالت میں پیش کیے گئے چینی سفیر کے خط پر پراسیکیوشن نے اعتراض اٹھایااور کہا کہ خط کا کیس سے کوئی لینا دینا نہیں ہے ، عدالتی وقت ضائع نہ کیا جائے ، احتساب عدالت کے جج نے ریمارکس دیئے کہ شہبازشریف کو پہلے بھی کہاہے کہ کیس سے متعلق بات کریں ، شہبازشریف نے کہا کہ قوم کو بتانا چاہتاہوں کہ میرے منصوبوں کو دنیا مان رہی ہے ۔
