عمران خیبر پختونخواں سے
پشاور کیپٹل سٹی پولیس پشاور نے شہر کے نواحی علاقے سربند اچینی بالا میں چاند رات پر اپنے جگری دوست کو قتل کرنے والے مرکزی ملزم کو گرفتار کر لیا، ملزم کے ایک ساتھی کو اس سے قبل ہی گرفتار کر لیا گیا تھا، گرفتار ملزم نے ابتدائی تفتیش کے دوران اپنے دوست بشیر احمد کو زبانی تکرار پر قتل کرنے کا اعتراف کر لیا ہے جس کے قبضے سے آلہ قتل بھی برآمد کر لی گئی ہے، مقتول ٹیلر ماسٹر تھا جس کو چاند رات پر قتل کیا گیا تھا، ملزم سے مزید تفتیش جاری ہے
تفصیلات کے مطابق مدعی میاں شیر ولد شمشیر سکنہ اچینی بالا نے تھانہ سربند پولیس کو رپورٹ کی تھی کہ اس کے بیٹے بشیر احمد کو اس کے دوستوں عثمان اور کامران نے فائرنگ کرکے قتل کر دیا ہے جس کی رپورٹ پر مقدمہ درج کر کے تفتیش شروع کر دی گئی
ایس ایچ او تھانہ سربند امتیاز عالم نے اطلاع ملتے ہی فوری کارروائی کرتے ہوئے ایک ملزم کامران کے فرار کی کوشش ناکام بناتے ہوئے موقع سے ہی گرفتار کر لیا تھا جبکہ دوسرا ملزم عثمان عرف مینے واردات کے بعد گھر بار چھوڑ کر فرار ہوا تھا جس کو گزشتہ روز ایس ایچ او سربند امتیاز عالم نے خفیہ اطلاع ملنے پر اچینی بالا سے گرفتار کر لیا ہے جس نے ابتدائی تفتیش کے دوران جگری دوست مقتول بشیر احمد کو زبانی تکرار پر قتل کرنے کا اعتراف کر لیا ہے جس کے قبضے سے آلہ قتل بھی برآمد کر لیا گیا ہے جس سے دوران تفتیش مزید انکشافات کی توقع کی جاری ہے
