پاکستان کے بعد ایک اور ملک نے بھارت کی جانب سے بلائی گئی کانفرنس میں شرکت سے انکار کردیا

نئی دہلی(نمائندہ خصوصی) پاکستان کے بعد چین نے بھی دہلی میں افغانستان کی صورتحال پر غور کے لیےبلائی گئے علاقائی قومی سلامتی مشیروں کے اجلاس میں شرکت سے انکار کردیا۔
تفصیلات کے مطابق چینی حکام کا کہنا ہے کہ چین پہلے سے طے شدہ دیگر مصروفیات کی وجہ سے دہلی علاقائی سکیورٹی ڈائیلاگ میں شرکت نہیں کرپائے گا۔ چین نے اجلاس سے صرف دو روز قبل افغانستان کے حوالے سے ہونے والی اجلاس میں شرکت سے باضابطہ انکار کیا۔افغانستان کی صورت حال پر غور و خوص کے لیے دہلی علاقائی سکیورٹی ڈائیلاگ کی صدارت بھارت کے قومی سلامتی مشیر اجیت ڈوبھال کریں گے جس میں ایران اور روس کے علاوہ پانچ وسط ایشیائی ممالک قازقستان، کرغیز جمہوریہ، تاجکستان، ترکمانستان اور ازبکستان کے قومی سلامتی مشیروں کو بھی دعوت دی گئی ہے۔
واضح رہے کہ بھارت نے پاکستان کو بھی افغان علاقائی سکيورٹی ڈائیلاگ میں شرکت کی دعوت دی تھی لیکن پاکستان نے شرکت کرنے سے واضح طورپر انکار کردیا تھا۔