لاہور (نمائندہ خصوصی) پاکستانی کرکٹر سعود شکیل نے جنوبی افریقہ کے خلاف قومی ٹیم میں موقع ملنے پر خوشی کا اظہار کرتے ہوئے کہا ہے کہ ہمیشہ سے پاکستان کی نمائندگی کرنے کا خواب مکمل ہونے کا یقین تھا۔ چیف سلیکٹر نے جیسے ہی ٹیم کا اعلان کیا تو موجودہ سندھ کرکٹ ٹیم کے کھلاڑیوں نے میرے کمرے کے دروازے پر دستک دینا شروع کر دی۔
تفصیلات کے مطابق سرفراز احمد، اسد شفیق اور انور علی سمیت کئی قومی ٹیسٹ کرکٹرز کی رہنمائی میں اپنا لڑکپن گزارنے والے سعود شکیل نے محض 12 سال کی عمر میں ہی باقاعدہ کلب کرکٹ کھیلنا شروع کردی تھی۔ فیڈرل بی ایریا کراچی کی گلیوں میں کرکٹ کھیلنے والے سعود شکیل نے سری لنکا کے کمار سنگاکارا کو اپنا آئیڈیل بنایا اوراپنے گھر سے صرف 7 کلومیٹر دور نیشنل سٹیڈیم کراچی کے تاریخی میدان میں ملک کی نمائندگی کا خواب سجایا اور پر عزم شخصیت نے 13 سال بعد ہی اس کے خواب کو حقیقت کا روپ دے دیا۔
سعود شکیل کا کہنا ہے کہ میں 15 جنوری کو منعقدہ چیف سلیکٹر قومی کرکٹ ٹیم محمد وسیم کی پریس کانفرنس نہیں دیکھ سکا مگر جیسے ہی چیف سلیکٹر نے ٹیم کا اعلان کیا تو ٹیم ہوٹل میں موجود سندھ کرکٹ ٹیم کے کھلاڑیوں نے میرے کمرے کے دروازے پر دستک دینا شروع کر دی۔ بائیں ہاتھ کے مڈل آرڈر بیٹسمین نے کہا کہ مجھے ہمیشہ سے پاکستان کی نمائندگی سے متعلق اپنے خواب کے پایہ تکمیل ہونے کا یقین تھا مگر گزشتہ دو سالوں سے میرے اعتماد اور حوصلے میں مسلسل اضافہ ہورہا تھا، مجھے یقین تھا کہ جلد پاکستان کی نمائندگی کا موقع ملنے والا ہے۔
سعود شکیل کا کہنا ہے کہ کسی بھی طرز کی کرکٹ میں پاکستان کی قیادت کرنا ایک اعزاز کی بات ہے، قومی ٹیسٹ سکواڈ میں شمولیت پر بہت خوش ہوں تاہم میرا اصل ہدف تینوں فارمیٹ میں قومی کرکٹ ٹیم کا مستقل رکن بننا ہے، میں خود کو بہت خوش قسمت سمجھتا ہوں کہ پاتھ ویز کرکٹ سے آگے آیا اور سب سے بڑی سطح پر پہنچ کر ملک کی نمائندگی کا مرحلہ وار سفر اب مکمل ہونے والا ہے۔
واضح رہے کہ سعود شکیل اب تک 46 فرسٹ کلاس میچوں میں 48.78 کی اوسط سے 10 سنچریوں اور 17 نصف سنچریوں کی مدد سے مجموعی طور پر 3220 رنز بناچکے ہیں۔ فرسٹ کلاس کرکٹ میں ان کی بہترین اننگز 174 رنز ہے۔ سعود شکیل لیفٹ آرم سپن باؤلنگ کا ہنر بھی جانتے ہیں اور اب تک فرسٹ کلاس کرکٹ میں 23 وکٹیں حاصل کرچکے ہیں۔ 67 لسٹ اے میچز میں 46.01 کی اوسط سے 2347 رنز بنانے والے سعود شکیل کا بہترین سکور 134 رنز ناٹ آؤٹ ہے، وہ اپنے لسٹ اے کیرئیر میں بالترتیب 26 وکٹیں حاصل کرچکے ہیں۔
