نیویارک(مانیٹرنگ ڈیسک) ایلن مسک ٹیسلا اور سپیس ایکس کے بانی ہیں۔ ٹیسلا الیکٹرک گاڑیاں بنانے والی کمپنی ہے جبکہ سپیس ایکس راکٹ اور خلائی جہاز بنا رہی ہے۔ اب ایلن مسک نے ٹیسلا کی الیکٹرک کار کو سپیس ایکس کا ’تڑکا‘ لگا کر ایسا ماڈل تیار کرنے کا اعلان کردیا ہے کہ سن کر آپ دنگ رہ جائیں گے۔ ایلن مسک نے کہا ہے کہ ٹیسلا روڈسٹر میں ’سپیس ایکس پیکیج‘ بھی شامل کیا جا رہا ہے، جس سے گاڑی کی رفتار میں بہت زیادہ اضافہ ہو گا۔ یہ گاڑی صفر سے 60میل (تقریباًساڑھے 96کلومیٹر) فی گھنٹہ کی رفتار محض 1.1سیکنڈ میں پکڑنے کی صلاحیت کی حامل ہو گی۔سپیس ایکس پیکیج کے ذریعے اس گاڑی کو اسی طرح طاقت ملے گی جیسے ایک راکٹ کو ایندھن سے ملتی ہے۔
ایلن مسک نے دنیا کو یہ خوشخبری ایک ٹویٹ کی شکل میں سنائی، جس میں ان کا کہنا تھا کہ یہ فیچر ٹیسلا روڈسٹر کی اگلی جنریشن میں شامل کیا جائے گا۔ واضح رہے کہ ایلن مسک کی طرف سے ٹیسلا گاڑیوں میں سپیس ایکس پیکیج شامل کرنے کا اعلان 2018ءمیں کیا گیا تھا، جسے اب عملی شکل ملنے جا رہی ہے اور جلد سپیس ایکس پیکیج کی حامل ٹیسلا گاڑیاں دستیاب ہوں گی۔ ایلن مسک نے اپنی ٹویٹ میں کہا ہے کہ ”سپیس ایکس راکٹ تھرسٹر آپشن پیکیج کے ساتھ آنے والی گاڑیاں محفوظ ہوں گی مگر یہ رفتار کی انتہائی نوعیت ہو گی جو ایسے لوگوں کے لیے مناسب نہیں ہو گی جو طبی عارضوں کا شکار ہیں۔ یہ ایک ’ہارڈ کور رولر کوسٹر‘ کی طرح کا تجربہ ہو گا۔“
