نیشنل انڈر 13 ٹورنامنٹ کا تیسرا رائونڈ مکمل، ناردرن، سدرن پنجاب اور خیبرپختونخوا نے اپنے اپنے میچز جیت لیے

کراچی۔31جنوری(غلام مصطفے عزیز)نیشنل انڈر 13 ٹورنامنٹ کے مکمل ہونے والے تیسرے رائونڈ میں ناردرن، سدرن پنجاب اور خیبرپختونخوا نے اپنے اپنے میچز جیت لیے۔یو بی ایل اسپورٹس کمپلیکس کراچی میں کھیلے گئے میچ میں ناردرن نے بلوچستان کو 7 وکٹوں سے ہرادیا۔ فاتح ٹیم نے 98 رنز کا ہدف 16.5 اوورز میں 3 وکٹوں کے نقصان پرحاصل کرلیا۔ محمد خضر 29 رنز بناکر ناٹ آئوٹ رہے۔ خان ولی نے دو وکٹیں حاصل کیں۔ اس سے قبل بلوچستان کی پوری ٹیم پہلے بیٹنگ کرتے ہوئے 97 رنز پر ڈھیر ہوگئی تھی۔ خان ولی 54 رنز بناکر نمایاں رہے تھے۔ کے سی سی اے اسٹیڈیم کراچی میں کھیلے گئے میچ میں سدرن پنجاب نے سندھ کو 6 وکٹوں سے شکست دے دی۔ فاتح ٹیم نے 138 رنز کا ہدف 24 اوورز میں 4 وکٹوں کے نقصان پر حاصل کرلیا۔ اوپنر محمد عمر 63 رنز بناکر ٹاپ اسکورر رہے۔ اس سے قبل سندھ نے محمد آذان کے ناقابل شکست 63 رنز کی بدولت مقررہ 30 اوورز میں 9 وکٹوں کے نقصان پر 137 رنز بنائے تھے۔ این بی پی اسپورٹس کمپلیکس کراچی میں کھیلے گئے میچ میں خیبرپختونخوا نے سینٹرل پنجاب کو 10 رنز سے ہرادیا۔132 رنز کے تعاقب میں سینٹرل پنجاب کی ٹیم جنید خان کی عمدہ بالنگ کی بدولت مقررہ 30 اوورز میں 8 وکٹوں کے نقصان پر 121 رنز ہی بناسکی۔فاسٹ بالر 15 رنز کے عوض 4 کھلاڑیوں کو پویلین کی راہ دکھائی۔ سینٹرل پنجاب کے تاج محمد 53 رنز بنا کر ناٹ آئوٹ رہے۔ خیبرپختونخوا نے پہلے بیٹنگ کرتے ہوئے مقررہ تیس اوورز میں 7 وکٹوں کے نقصان پر 131 رنز بنائے تھے۔ محمد زید 43 رنز بناکر آئوٹ ہوئے تھے۔