ویانا(نمائندہ خصوصی)آسٹرین دارالحکومت ویانا کے میئر مائیکل لڈوگ نے کہا ہے کہ ویانا میں ہمارا مقصد تمام مذاہب کے لوگوں کو الگ کرنا نہیں بلکہ اکٹھا کرنا ہے ۔
آج کل آسٹریا خصوصاً ویانامیں مسلم کارڈ پر بحث جاری ہے اسی سلسلہ میں ویانا کے مئیر مائیکل لڈوگ نے اپنے سوشل میڈیا پیغام میں کہا کہ میں بظاہر دائیں بازو کے انتہا پسند گروپوں کے ان اقدامات کی شدید مذمت کرتا ہوں جن کا مقصد لوگوں کو بدنام کرنا ہے۔ ان کا کہنا تھا کہ ہم ویانا میں انضمام کے اقدامات کو عملی جامہ پہنانے کے لئے بہت محنت کر رہے ہیں اور ہم نے کئی سالوں سے ایسا کیا ہے لیکن میں نے ہمیشہ ایسے اقدامات کرنے کے خلاف انتباہ کیا ہے جو لوگوں کو الگ کرتے ہیں۔ مائیکل لڈوگ نے کہا کہ اسی لئے میں نہ صرف اس طرح کے بنیاد پرست اقدامات کی مذمت کرتا ہوں بلکہ ایسے سیاسی فیصلوں کی بھی مذمت کرتا ہوں جو اس طرح کے بنیادی اقدامات کی حمایت کرتے ہیں۔اسی دوران میں سیاست کے ذمہ داروں کے خلاف دھمکیوں کی سختی سے مسترد کرتا ہوں۔
انہوں نے کہا کہ ویانا میں ہم یکجہتی کی راہ پر گامزن ہیں اور شہر میں تمام سماجی گروہوں اور مذاہب کے نمائندوں کے ساتھ مل کر کام کرتے ہیں۔میئر ویانا نے مزید کہا کہ ہر ممکن حفاظتی اقدامات کو ان گروہوں کے خلاف استعمال کرنا چاہئے جو معاشرے میں آئین یا کھیل کے سیاسی قواعد کی پاسداری نہیں کرتے ہیں، شہری معاشرے میں پرامن طور پر حصہ لینے والوں کو ہدف تفریق سے بچایا جانا چاہئے۔
