واشنگٹن (نمائندہ خصوصی) امریکہ نے بھی افغانستان کیلئے بھاری مالی امداد کا اعلان کر دیا ۔ واشنگٹن کی جانب سے کابل کیلئے 30 کروڑ 80 لاکھ ڈالر امداد کا اعلان کیا گیا۔
اقوام متحدہ کی جانب سے افغانستان کیلئے 5 ارب ڈالرز کی ہنگامی امداد کی اپیل کی گئی تھی جس پر امریکہ نے 30 کروڑ 80 لاکھ ڈالرز امداد کا اعلان کیا ۔ ترجمان سلامتی کونسل کے مطابق اقوام متحدہ کی جانب سے امداد غیر سرکاری تنظیموں کو دی جائے گی ۔اقوام متحدہ کی امداد کے شعبہ ( یو این ایڈ) کے چیف مارٹن گریفتھس نے کہا کہ افغانستان میں انسانی بحران سنگین ہو گیا ہے ، وہاں مکمل طور پر انسانی تباہی آنے والی ہے ، دنیا افغانیوں کے لئے اپنے دروازے بند نہ کرے ۔
چیف یو این ایڈ کے مطابق افغانستان میں فوری امداد نہ کی گئی تو 10 لاکھ بچے بھوک سے متاثر ہونگے ۔ غذائی قلت ، بیماریوں اور موت کو روکنے کیلئے ہمیں آگے بڑھنا ہوگا۔40 سال سے مصیبتوں کا شکار افغانیوں کا مستقبل ڈوب چکا ہے ، رواں برس 47 لاکھ افراد اور 11 لاکھ چھوٹے بچے غذائی قلت کا شکار ہوں گے ۔
